♥ 千千媽與小芊芊 ♥: 2013

才剛滿1歲1個月
雖然小芊芊的行為不是我想像中那般斯文
但卻越來越發現她非常的嬌嗲
尤其特別嗲媽媽
媽媽我實在是甜到入心入肺卡卡卡卡

踏入13個月小芊芊很黏媽媽
晚上一定要媽媽陪才肯睡覺
在婆婆家的日子
小芊芊一向是由媽媽幫她沖涼後媽媽馬上沖涼
換衫食奶刷牙哄睡的工作就由婆婆負責
通常我沖涼後出來小芊芊經已熟睡
現在換衫還可以
但食奶刷牙哄睡一定要媽媽
即使超級眼訓都要等到我沖涼出來陪她為止
婆婆怎哄都不肯睡
但我一放她上床哄都不用哄就auto sleep…
係屋企試過由爸爸哄睡結果都係唔得既
又係大喊喊到我沖完涼出黎氹先肯訓

有次媽咪爸爸和小芊芊一起玩
玩玩下爸爸攬實媽咪
小芊芊見到後走過來
仲以為佢想一齊比爸爸攬
點知佢一手推開爸爸… 哈哈哈哈~~~~

有媽咪在場既時候
無論剛睡醒未訓飽扭訓覺行街街坐車車
一開始扭計就一定要媽咪抱
第二最貼身既爸爸嫲嫲婆婆公公抱都唔得
佢地一抱就大叫大喊
所以最近我真係抱多左小芊芊
尤其出街坐車車識得叫悶扭抱
搭地鐵冇位坐時都要企住黎抱
一識尖叫真係冇辦法
呢個階段仲未受氹
唔抱住真係驚比隔離車卡既人走黎鬧我~~~

今年好多蛇bb 蛇bb們一在場
小芊芊就upgrade做小朋友媽媽心愛既大bb
想抱住小bb同小芊芊一齊影相真係休想
小芊芊扭抱既時候
一見我抱小bb 即刻喊住要我
抱住小bb既我真係怕她整親小bb
結果想影幅一家4口既大合照
多數都係泡湯既哈哈~~~
要同佢warm up晒成個環境先肯受氹

夜晚陪佢訓覺覺
一般都要陪至少半小時
又唱歌又傾計又講故事又扮講電話先會慢慢入睡
一遇上當日去街超過半日
呢隻難玩b當晚就會精神無比(仲諗住長時間放電佢會好快訓著…)
戀床起碼1小時或以上
但呢1小時會發現好多好sweet既行為
幾個月前佢會趴去我塊面度咀對咀咁kiss我
而家會碌下碌下戀去我度要我攬住佢訓
昨晚仲識一手捉住我左手放喺佢右邊面仔
然後又捉住我右手放喺佢左邊面仔
跟住好開心咁笑得好甜
有時就用腳仔貼去我個身或者塊面度
(因為我好鐘意錫佢腳板仔~~~)

媽媽我其實一直都好期待小芊芊黏媽咪
小芊芊由出世開始從來都唔怕陌生
咩人都抱得所以認定佢唔係黏身b
沒想過佢呢個moment佢變得黏媽咪
婆婆嫲嫲話bb係咁的越大越黏媽咪
尤其我地同床訓著我預左要黏足幾年…
身邊既朋友都話小芊芊嗲爆
有時爸爸抱都唔肯連爸爸都開始妒忌
覺得阿女唔鐘意佢喎~~~
爸爸放心啦小芊芊咁嗲第日撒嬌實lum死你吖!!!

剛開始呢個咁黏身既階段
雖然有時都覺得幾累下(只係肉體既累~~~)
心靈上我真係好enjoy好珍惜
不過依呢隻難玩b黎睇黏身時期應該唔會太長
我要加把勁提高自己既耐性同埋正能量
要小芊芊有個超級幸福快樂既family life

小芊芊 ♥ 9 Months成長印記
2012年7月12日 - 2013年8月11日
Week 40 - Week 44
Day 274 - Day 304

9個月
體重: 17lbs
身高: 70cm
腳仔: 10.5cm起初磅黎磅去都係15磅
諗極都冇理由點解2月都keep住得15磅
明明日日抱住佢都覺得佢重左
早兩日再磅又係15磅
千千媽: 屎啦! 成日都係得15磅點解芊芊唔會重架?
婆婆: 你對眼睇咩架? 咪重左囉! 17磅呀!
係喎…我抱住阿女企咩左黎睇個磅 kakakaka

衫仔著緊6-9M 最fit身
成日覺得小芊芊好細粒應該買比standard細1碼既衫
結果… 買左好多岩岩好fit晒身既衫… -_-"
不過真係fit身衫著得好好睇好可愛
大一碼有時個領口衣不稱身咁
原來阿女都係跟standard碼既
我發現小芊芊係跟足外國品牌既衫仔size走的
係咪外國bb對強國bb黎講都係偏細粒呢?

小芊芊雖然係細細粒既細碼b

但係手手腳腳都有d肉地架

而且仲好大力tim 好鐘意拎重野架 XD

食奶奶不用氹 小芊芊而家食奶好乖
每日4餐奶基本上都肯乖乖飲晒我地開比佢既奶奶
最大既進步就係之前公主病點都唔肯自己渣奶樽既小芊芊
而家終於會自己渣奶樽飲奶 (不過飲飲下會自己玩-_-")
雖然如此就係連婆婆都放晒手等佢自己飲奶既時候
我奶奶都仲係抱。住。佢。飲。奶!!!
(點解仲係唔明白寵佢 = 害佢既道理呢???)

第1次自己渣奶樽呀小芊芊好鐘意咁樣渣奶樽XD

有時會咁樣飲幾疏干!

最鐘意一邊飲隻手就搵其他野搞

呢個月
都係4奶1固中午食軟飯仔
6am 6安奶
11am 3餸軟飯
3pm 6安奶
7pm 7安奶
8pm 飯仔魚 (少量)
9pm 水果
1030pm 7安奶

這個少食多餐的小芊芊
減左1餐奶之後其實到而家
小芊芊餐餐都係食小半碗飯仔
(應該大約1/3個standard size既飯碗)
雖然食得少不過都有明顯進步架
由9個月初仲係喊住黎食小半碗都食唔晒
到而家10個月肯開口比你放啖飯入口
(當然都係一時時要睇佢心情!)
嫲嫲同婆婆都話餵佢食野舒服左好多 XD

我發現佢近一個星期快肚餓左
好明顯d奶食唔飽佢
其實想加到餐餐7安但佢一氣過係食唔到7安
一定要分兩次食先得唔係會吐奶
因為朝早同下午茶果餐佢多數食住訓或者食完即訓
所以都係冇打算加到7安
佢都係適宜少食多餐

黎緊第10個月夜晚都要食飯仔喇
不過就唔減奶住試一個月食
如果中午食到半碗
夜晚又食到小半碗的話先再算

小芊芊食過既食物 蔬菜：菜芯白菜仔莧菜小棠菜
瓜果：節瓜蕃薯薯仔紅蘿蔔南瓜冬瓜佛手瓜肉類：瘦肉魚肉(鯇魚三汶魚紅衫魚朧脷)
其他：粟米水蛋黃鮮淮山烏冬字母粉河粉水果：蘋果香蕉火龍果蓮霧金毛奇異果脆梨西梅
湯水：紅蘿蔔粟米瘦肉湯節瓜淮山瘦肉湯節瓜響螺瘦肉湯蘋果雪梨瘦肉湯
零食：星星餅芝士糙米包

小芊芊仍然係除左比星星餅先會自動開口之外
其他食物都冇話會追食
夜晚見我地食飯佢會扭要食飯
我同爸爸會比幾啖飯仔佢食
如果見碟清清地冇咩油都會夾幾舊魚肉佢食
佢都會好肯開口食

平時佢唔肯開口食飯/水果時
我地會灌佢食多幾啖就收工
雖然喊住比人逼佢食野
但塞到入口佢都會照食 (都幾有依食wo~~~)
有時知自己咀邊有飯粒佢會用佢隻唔識協調既手
想將d飯撥返入口但撥唔到
變左塞左隻手入口 and then口入面d飯都跟隻手一齊走返晒出黎 -_-"
雖然如此但都係一副有衣食既表現 haha~~~

講到咁但有樣食物佢係極度抗拒
平時入左口既食物唔會吐既佢
食完呢舊野即刻吐都吐唔切 XDXDXD
就係千千媽好鐘意食既木瓜啦 KAKAKAKA~~~~
第1次比佢試佢聞到已經叫救命
好辛苦塞到入佢口佢即刻不顧一切吐返出黎 XD
奶奶叫我每日灌佢食等佢習慣要食
咁又唔洗咁慘生果啫又唔係主食
佢肯食蘋果奇異果西梅我已經好滿意 (係唔肯食蕉lor…)

poopoo大進步過去小芊芊既poopoo係媽咪既最大煩惱
呢個月好大進步呢
上個月幾乎要日日兜先有poopoo
呢個月應該已經知道自己要日日poopoo
平日基本上每朝9-11am之間會自己去
去到婆婆屋企都有咁做過
(不過唔係次次喇…)
poopoo既質地都幾好通常每日早上1次
如果朝早冇poopoo 奶奶就會兜佢去多數都有
有時早晚1次夜晚大約係食最後一餐奶果個時候去
夜晚果次通常會爛d 不過未至於水狀
所以我放心左好多

呢個月甘甘條只係用左1次
因為連續兩日去唔清之後兩日就谷住去唔到
甘甘條一出就好用力去左一舊比雞蛋細少少既poopoo出黎
其實d食材我全部都揀d唔影響便便既
個個星期都keep住咁食
所以都未睇得出有咩特別野令到佢當日冇poopoo
唯一解釋係佢懶 XD 所以唔肯去poopoo卦

爛玩B而家其實都唔太驚比陌生人抱抱
但都會望一望先
知道果個人係媽咪都識既
佢好快就會對住人笑晒口咁
我d朋友個個都比佢氹到暈晒大浪喇 XD

去到邊都要玩
見到小朋友就更加tim 掹住唔放tim
去到婆婆屋企狂扭公公婆婆同姨姨抱
呢個抱緊就打開雙手要隔離果個抱
好彩既係一見到媽咪就第一時間要媽咪抱 :p
撞親痛痛都係要媽咪
爸爸都唔得架爸爸抱繼續喊
但媽咪一抱就收聲兼好快笑返~

係房門外裝房入邊既婆婆

一見到同自己差唔多身形既小朋友小芊芊就好hyper主動要同佢地玩

當然最開心係爸爸同佢玩飛高高啦

一見到有野係窗花就拼命血上擒
一定要掹到佢地落黎為止

舅父同佢玩飛高高睇佢個樣幾得戚~

玩具唔鐘意玩
最鐘意玩紙紙巾同埋搞亂檔
鐘意將個任何有盛東西既盒裡面既東西全部晒出黎
但係教極佢將d野放返入盒度都唔聽
你呢頭放入去佢果頭即刻掉返出黎…

玩紙巾真係要睇住
佢鐘意撕紙巾撕撕下趁你唔覺意食左d紙巾碎
成日發現有一忽仔紙巾唔見左
次次發現都要將佢手上既紙巾碎砌圖睇下唔見左幾多
所以而家房入邊一定要全用Tempo紙巾
等佢撕得冇咁容易同埋食左都冇咁快溶…

最鐘意將我個裝滿唇膏既盒倒晒裡面d野出黎

小芊芊最鐘意玩呢盒野因為搖佢有聲 :p

千千媽：咁甜 5歲過後先好諗~~~

自從有次我比佢飲左一啖鈣c寶
小芊芊而家見紙盒飲品就兩眼發光

難玩b現形啦~~~

平時都好鐘意玩我d手錶

去到婆婆屋企就鐘意玩日常既生活用品
eg. DOVE沐浴露 & 洗頭水 XD

開櫃門亦都係佢指定動作之一

別的bb沖涼就鐘意玩水
小芊芊沖涼係鐘意玩水以外既野
eg. 浴簾水龍頭浴缸扶手…
水入邊既鴨鴨同玩具係唔會掂既 (佢只會推開佢!)
仲有佢唔太喜歡浸係水入面一落盆佢就要企係度
不過我有日拍佢盆水佢見到d水彈左上黎
自此之後佢就好鐘意拍水
而家仲識得拎起沖涼用果條紗巾發落d水度
邊個同佢沖涼阿個就一定濕身喇 haha!

而家識得fing巾巾 (仲要有咁多水yam咁多水!)

仲有大大力拍水

識扶住扶手或床欄企
最近仲好大膽咁成日放開晒兩隻手
企都2 3秒架跟住就好開心喇~~~
房個窗花一直係我既恐懼之一
佢一走埋去窗花度就一定掹住咁企係度
我地放野係窗花佢一定會掹返d野落黎
而家叻到識擒窗花 (爬樓梯…)
落1級都識不過擒得太高就唔識落喇~
(呢個就係我一直所講既恐懼!!!)
我叫奶奶睇住佢唔好比佢擒
奶奶：佢一定會擒咕喎邊有細路仔唔擒
我明白但要教佢唔好擒要斯文
奶奶：唔好以為係女仔就斯文呀而家d女仔係好曳架!
你肯同我一齊教我唔信我個女會唔斯文喇…
(呢一樣就係由我未生時已經知道會有既恐懼!!!!!)

一有野扶就企得好穩

呢個看似危險不過公公婆婆又任得佢玩
之前舅父見到佢玩就大驚係咁捉住佢唔比佢走埋佢
搞到佢呱呱嘈 XDXDXD

扶住疏化就可以行到幾步

不過好多時仲係用腳尖行

出街唔再乖乖坐定定喇
搭地鐵要捉扶手唔比佢捉會發忟忟
見我地坐低佢就唔肯坐車車要我地抱佢搞搞震
去食店食飯更冇時停 bb櫈形同虛設
一時要我地抱一時要企櫈櫈有時百厭到爬埋上枱!!!
還妹仲未識尖叫仲可以control到佢
哈哈哈哈~~~~

有時係地鐵見有好多位既時候都會放佢上去坐下

去到餐廳就坐唔定係要搞張枱

有時仲百厭到爬埋上枱真失禮-_-"

小芊芊都幾鍾意食王林蘋果

而家見架就扶實要擒甚至玩單槓…

肢體語言溝通之雞同鴨講進步篇而家一聽到人叫佢個名會即刻望果個人
叫佢唔好掉野落地繼續係即刻掉比我睇…
(仲要呢頭講完唔好掉果頭就掉左!)
喊少左除非唔比佢玩想玩既野
同埋逼佢做d唔想做既野 (eg 食飯食果果)

叫佢講野佢都係唔會講野…
聽過一次佢叫媽媽但唔係聽得好清楚
不過我近幾日發現佢搵我時叫"咩咩"
我係千千咩 XDXDXD
唔叫爸爸叫爹聽過佢叫幾次!
我地教佢hihi手同byebye手
指導佢做都做得到 (不過都係一時時~)

而家醒目左
放工返屋企佢已經知道我要換衫洗手先出黎抱佢
我入房時佢唔再喊喇會企係床仔企企
等我一打開房門出去時佢就會笑得勁開心
同埋伸開手要我抱抱

吽牙仔完全消失了9個月既小芊芊仲係未出牙仔
一d出牙仔跡象都冇呢…
係咪缺乏d咩呢???
未有牙仔出所以口水都唔係太多
開口講野時吔吔吔咁就會不停流口水
其他時間唔講野就冇喇

最近有一晚陪小芊芊飲完奶奶
佢係度要同我玩
其實有時佢哄埋黎撻個咀去我塊面度時
之前我覺得佢係冇意識咁做的
但呢晚我同佢玩佢好開心
係咁望住我不停咁笑
好開心之際佢爬埋黎真係咀左我一啖
(當然係成咀口水啦~)
但佢錫完望住我繼續好燦爛咁笑
佢真係有意識咁做咕喎~
我就梗係lum到爆啦!!!

小芊芊黎到第10個月佢已經知道邊個係佢既爸爸媽媽
我地既地位當然無人可以取代啦
我以前有好多既恐懼
或者係時間關係我同奶奶之間既相處
由好多自己埋藏住既不滿不愉快事
隨住小芊芊既長大
大家都改變左好多
我同奶奶其實都明白婆媳關係唔易處理
有好多野我唔方便講
還好佢都諗得通有時都會聽我講
我都放低左好多

不過都說恐懼還是有的
esp 飲食問題 & 教育問題
說教教仔與教女不同
就如擒窗花既問題
奶奶有兩個仔仔周圍擒當然沒問題
所以可以由得佢
問題在於佢覺得呢d冇得教
要擒就擒 control唔到
但你而家日日見住個孫都唔教
只靠我見到先教個女(我每日先對得個女2小時!)
將來佢見野就擒咁會點?

我明白佢諗乜
但我真係唔會接受呢一套
好多時要用好多方法同佢傾
要忍受同時又要講道理
不過見到小芊芊有嫲嫲婆婆公公錫
未做過人地個孫孫既我黎講
我真係好羨慕呢!