小芊芊 ♥ 17 Months成長印記

小芊芊‧17Months
2014年3月12日-4月11日
Week 74 - Week 79
517days - 547days

Height : 76cm
Weight : 9.2kg (20.2lbs)
Foot length : 12cm
No. of teeth : 6

餐食
•lunch : 3餸爛飯 (大人standard碗滿碗份量)
•dinner : 3餸爛飯 (大人standard碗滿碗份量)
•每餐必有深綠色菜
•雞蛋隔日食
•魚肉(紅衫魚鯇魚三文魚驢魚)瘦肉間餐食 
•其他豆腐薯仔蕃薯蕃茄南瓜蘿蔔間餐食
•肉同菜開始大舊咁比佢食 唔砌咁碎喇 不過始終少牙仔 d餸都係要砌粒粒
•fruit: 呢個月完全冇食過水果!!!
•snack: 唔肯食乳酪 , 食卡夫芝士 / 白面包 / 麥包

水果唔食我真係冇佢符

唔想逼佢 亦都逼唔黎 唯有由得佢

得閒試下佢 我諗總有一天佢會發現水果係好野!

其實佢食足晒lunch同dinner既飯飯

兩餐都能夠食到飯碗滿既份量 我已經好滿足

畢竟我本身對食都冇咩要求

又邊可以要求個女食咁多野呢

小芊芊唔食甜的

曾經比佢食過既布甸 蛋糕 雪糕 燉奶通通耍手擰頭

bb夾心餅餅見到就掉頭走

甚至最近比佢食左啖蛋tart 入口即lur …

都好 唔食甜野 好事來的

唔食甜 但鐘意食鹹

凡係鹹既比得佢食既佢都會返兜

茶葉蛋鵪鶉蛋佢都幾鐘意食

最鐘意食魚 食自助餐淨係肯食魚

仲要食得津津有味

一向以為鵪鶉蛋膽固醇好高

唔岩小朋友食

(仲一度質疑點解而家仲會有大人買蛋仔比小朋友食)

有日睇左篇文章

原來鵪鶉蛋好有益的

小朋友每日食兩三隻對腦部發展好好

行街時見到有得買

就買左袋回家比小芊芊食1半

小芊芊好鐘意食呢!

奶奶

•2號奶 : 早餐7am / 下午茶3pm / 宵夜10pm

•每餐由6安減至5安
打從1歲正式轉兩餐固體開始

3餐奶奶已成為佢既習慣食糧

仲要冇佢唔得果隻…

朝早6點半自動狂轉身扭醒要食奶

5分鐘內飲極速返訓
下午3點未夠就lur婆婆嫲嫲要奶

又係食完即訓 訓到5點先起身

夜晚沖完涼就係咁搵奶奶

冇奶奶就叫到拆天

但呢餐飲完又未必刻訓喎…

訓覺

•婆婆家：媽咪返工(8:30)佢就起身

•嫲嫲家：9-10點起身

•午睡：多數3-5pm, 飲完下午茶奶就訓

1. 睡眠質素差

睡眠質素都係唔好

其實都係我地唔好啦

搞到阿女晚晚都夜訓…

係嫲嫲家 我地早極返到屋企都8點

玩一陣8點半開返食到9點

我地食完飯同佢再玩一陣就沖涼

10點前食埋奶奶刷牙開始訓

佢係床同你碌一輪 至少碌返半個鐘先肯訓

有時甚至更夜

要佢9點訓

即係我地平日唔洗旨意見個女

假日視乎我地幾點去完街返屋企

不過住到咁遠 多數都唔早得幾多

2. 訓覺要媽媽

嫲嫲湊 - 有時午睡仲要un住抱住訓

婆婆湊 - 通常食完3點奶即訓

同嫲嫲講過好多次唔好抱住訓

嫲嫲話唔抱佢唔肯訓…

但婆婆又得呢…真係唔知咩原因…

夜晚訓覺一定要我

爸爸陪都唔會訓 會指住門口要媽媽

婆婆試過想訓我個枕頭扮訓陪佢

佢推開婆婆 指住個枕頭叫媽媽

公公都試過 都係咁既反應

同寶貝訓覺 好開心的

仲可以教佢好多野

(佢有好多野都係我地訓覺時傾計學返來的)

得閒又會gut起身攬實你

一時又堆個頭仔埋黎錫我個咀

有時仲成個身挨住我

然後拎起我隻手放係佢肚仔度 要我攬住佢訓

總之好多古靈精怪野 好sweet!

小寶貝而家識得聊媽咪同佢玩

成日好多古靈精怪表情

一見到佢d表情就勁開心^^

 

飲水水

用杯飲水 而家倒多d比佢都唔怕

好少會漏 而且飲得好好

但飲到咁上下要睇住佢吞

叫要係咁叫佢吞吞吞吞吞

唔係佢會玩野嗽完口就吐返出黎…

上playgroup食茶點時

老師派杯杯比bb飲水水

幾個家長見我由得小芊芊自己拎住個杯飲

都叫我小心d扶實佢…

當佢地見到小芊芊識自己拎起杯杯飲晒d水

都讚佢好叻叻…

因為其他小朋友都仲未識用水杯飲水

不過話佢鐘意飲水又唔係 一時時既

有時攬住個水樽當寶

有時叫佢飲 佢就係咁意敷衍下飲一啖就走佬

但換下個水樽 遇到個岩佢心水既就發達咯!

可以成支水同你飲晒-_-"

用水杯飲呢 有時要比兩隻佢倒黎倒去

倒下飲下 佢又會飲好多…

poo poo 

1. 質量差

•日子不定 - 有時連續兩日有 有時隔3日都唔去

•時間不定 - 有排定時朝早10點去 但隔一排又變左食食下晚飯去…

•texture - 有時又黑又硬 有時又黃又軟 有時粒粒狀

飲水唔多 水果又唔吼

poopoo唔靚係正常…

自問真係個個bb唔同

有bb自細已經定時定候poopoo

仲要d poopoo鬼咁靚 我真係好羨慕架

因為自小芊芊半歲起

呢個問題一直無間斷咁煩擾我

到今時今日 有時見佢谷谷下便便又唔去

3日都未有poopoo出現 真係火都黎!!!

但都冇辦法 唯有得閒提下佢要poopoo

見佢過3日唔去 就塞佢甘甘條

2. 甘甘條後備\

起初真係怕塞慣佢唔肯自己去

但係我發現我諗多左…

佢被塞過咁多次甘甘條都係驚的 (始終都痛家ma)

so far出動甘甘條次數都唔多

同埋有便意有得去既佢都會出盡力谷

好多時都poo到d大舊既硬poopoo

今個月用左2次甘甘條

所以而家甘甘條唔怕用

至怕佢唔肯去 XD

3. 初試小廁板

有樣野好得意的 佢會lay埋去poopoo

仲會坐係度去 係lay埋一個角落坐住poo 

(有野比佢坐時會坐 冇野比佢坐時就紮馬 XD)

係婆婆度 佢會走入我間房坐係床邊d雜物度

一係就踎係toilet門口個凹位

所以我覺得係時候可以比佢接觸下個馬桶

婆婆早前買左塊公主廁板過佢

就即管試下比佢坐

點知…一抱佢上去就變左koala

攬實我唔放 夾硬就大叫

佢驚個廁所窿囉!!!

我坐埋比佢睇都唔肯制

本來諗住skip左potty階段 直接比佢上馬

睇黎都係比個potty佢適合d

天氣暖 又就黎歲半喇 要train train啦!

唔肯食果果又唔多飲水水

有時見佢谷poopoo好用力好辛苦

面仔都紅晒咁都冇辦法咯

我唯一只係可以幫佢塞甘甘條

不過唔到最後一刻都唔會貿然出動的!

 

認知能力

•眼耳口鼻頭髮牙完全冇問題 而家學頸頸 膊頭 膝頭 腳板

•街上事物：車車  燈燈  花花  星星   垃圾桶

•玩具：波波 Kitty 杯杯

•動物：識講  bird bird  蛙蛙  馬馬   魚魚fish fish  貓貓  汪汪

  兔兔  monkey  bear bear   pig pig   鴨鴨  羊羊   獅子  老虎 

  大笨象 長頸鹿  鼠鼠

•物件：

  牙刷 -  見慣阿姨刷牙 一拿起牙刷就放入口

  梳 -      見到梳就拎起梳自己個頭 一係搵我個頭梳

  拖鞋 -  最喜歡阿姨對拖鞋 阿姨一返屋企就拎對拖鞋幫阿姨著

  鞋 -      想出街時 就拎對鞋比我地 示意要我地帶佢出街

  牙簽 -  爸爸有盒專用膠牙簽連牙線

               爸爸一食完飯就要我帶佢去拎盒牙簽比爸爸撩牙

  支支樽 - 一見到就要洗手  

  紙巾 -   會用黎抹咀 抹枱 抹地

  眼鏡 -   我同佢講過一次 媽媽訓覺覺要除眼鏡

                之後每次佢見到我訓覺冇除眼鏡 佢就會幫我除

                仲好好手尾咁摺好我副眼鏡放係床頭~

  鐘鐘 -    知道爸爸媽媽8點要食飯 知道10點要訓覺

                沖完涼佢就會指住個鐘 我話已經10點喇 佢就會叫我熄燈訓覺

•人物：兩邊家人稱呼都識晒   出街見女性會叫姨姨  

              bb 男仔 女仔 老師都知係咩野

呢兩幅大掛畫非常的有用

佢一得閒就伸出佢隻金手指篤黎篤去

跟住 "唔" 你要你讀比佢聽

你就會好似答錄機咁瘋狂將某d字repeat n repeat

呢樣工作只有媽咪同婆婆先肯做

不過好有效的

而家基本上掛畫上既所有圖片佢都識晒

問佢都好快指對圖片

小芊芊第1本書書

其實買左好幾個月

之前望都唔望

而家自己得閒就會係個箱度搬出黎

要你陪佢一齊睇

表達能力

其實知佢乜都識

講乜佢都明 表達能力都ok

係憫憎d 有時想做但做唔到就有少少脾氣

起碼我大多數都明白佢想點 或者知佢想做d乜

學習能力真係快 所以佢指乜我就講乜

有時不停指住其中兩樣野 我就不停咁講

爸爸聽到都嫌我口臭 嘻嘻!

唔怕啦 講得多識得快呀!

所以歲半去健康院時

姑娘都話佢比同齡算識得多野

說話能力

•物件 - 星星 杯杯 車車 波波 Kitty clock clock 鞋鞋 奶奶 水水

•動物 - 馬馬 蛙蛙 鴨鴨 bird bird 魚魚 fish fish 豬豬 鼠鼠

•人物 - 爸爸 媽媽 嫲嫲 婆婆 姨姨 虎虎 母母

•表達 - 知 冇 打打  ning ning (good morning) nite nite (good night)   

活動能力

•走路 - 好左少少 但都係唔穩 用腳尖走路多 鐘意人抱佢多過行

•上落樓梯 - 好鐘意 多數係樓梯前放佢落地佢都肯行

                     扶佢一陣行得順仲會連住步伐咁上或者落

•擒 - 識搵物件輔助之下擒 打佢就企定定唔郁住 見你冇野又again!

         識擒婆婆張皮sofa 擒上sofa頂坐係度笑 (好似好有成功感咁-_-")

•畫 - 拎起筆畫野有力水左好多

•搯 - 用匙羮畢飯都畢得好好 可以自己食到幾啖飯

         (隻羮一過佢手就玩多過食 通常比佢自己食幾啖就餵返佢)

最鐘意一步登天…

成日想擒上婆婆張床個床pan

(邊度擒得到…)

係屋企就擒床仔個欄

一腳踏上去好似做Yoga咁

如果佢鐘意

比佢學體操都唔錯 哈哈~~~

公公好疼小芊芊

一放假就主動話要帶小芊芊去公園玩

說實話

我從來未見過老豆見到小朋友會咁開心

而且公公出名不喜歡小朋友

自己既孫女真係唔同d

成日將個波塞去爸爸肚dum度然後錫啖

老積芊一笑就咪咪眼

成日渣住個形狀積木當水杯要去斟水

 我當年套煮飯仔係時候可以上場喇~~

呢排好鐿意做d大喇喇既動作

勁鐘意著阿姨對拖鞋

bb女d衫仔同鞋仔真係好靚

貪靚既千千媽梗係無可能忍到手唔買啦…

所以而家我個衣櫃經已比阿女霸佔左一半

d鞋仔多到老公d鞋都唔知擺去邊好 XD

呢日趁阿女入左房

我就排左呢幾對新鞋係客廳

當佢一出房見到佢地既時候

"哇 哇 哇!!!"

望住D鞋鞋哇左好多次

勁開心咁要我幫佢試完呢隻試果隻

女仔真係天生愛靚靚架!

 
呢袋衫係千千媽的
我買完佢就即刻拎起呢個袋唔肯放
阿女 雖然多數行街街你都有收鑊
但唔代表所有濕平袋都係你架 XD

小芊芊有幾本大相簿

我放左係房個角落度

小芊芊一得閒就好鐘意拖佢D相簿出黎

逐本揭黎睇

遺傳晒媽咪鐘意做既野呀!

間唔時小芊芊都會無啦啦扭出街街架

有時屋企人落街買野

一閂鐵閘知道佢自己冇份既時候

就會喊幾聲

一打開門就會係鐵閘度徘徊

唔覺唔覺

打完以上既野先驚覺

小芊芊今個月學野真係好快

同埋學多左好多野

去健康院check up

雖然得20lbs 但都係跟住生長線走

姑娘話一切進度好好 仲話我要求高!!!

…

說實話 我從來都唔覺得阿女好細粒

而且佢手腳有肉地架 仲有小腳瓜~~~

講野方面本來真係唔覺佢識講咁多

姑娘問我佢講唔講到10隻8隻字

我答佢"都有8隻既…"

佢叫我將阿女識講既講晒佢知

最後比佢抽我後腳 "佢咁點止識8隻呀?" …

又係喎 唔講真係唔覺

數完自己都不知不覺咁滿意左阿女既表現

哈哈哈哈~~~