小芊芊 ♥ 32Months成長印記

小芊芊 ♥ 32Months

2015年6月12日 - 2015年7月11日

Week140 - Week144

978 - 1007 days

企直直影相 32個月既小芊芊好lady呢~

Height：87cm

Weight：12.3kg (27lbs)

Foot length：14.5cm

No. of teeth：17

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

飲食方面

奶-illuma 3

繼續早晚各5oz

個奶樽個咀仲好頑強 未捨得爛

不過一到飲奶時間 佢經常同我講
〝個奶樽就黎比我咬爛架喇！到時要用杯杯架喇~~~〞
哈哈 其實唔係想佢戒奶樽
我反而係想佢戒左覺都未訓醒就lur飲果餐早餐奶吧了…
唔想佢啜完奶奶又訓返呀
奶粉始終都係甜 怕佢會蝕牙

飯 / 粉

食材方面都係多菜少肉為主
到目前為止 食完正餐你比幾好味既佢都唔會食
不過食正餐開始坐唔定囉
開始果時好乖坐定定架
但食左半碗左右就想逃走
一唔想再食就話〝我飽喇！我唔食喇！〞
所以到今日 食一餐都係要一小時左右
菜魚雞豬牛蛋瓜菇豆佢全部都愛食
最最最最最鐘意食蝦！
唯一食得差既就係菜葉 大塊少少都會lur渣
不過超愛吃菜梗

零食

零食都係少食
茶點時間食下茶葉蛋/ 芝士粒/ 芝士糬波/ 海綿蛋糕卷
咬兩啖就好滿足架喇
還有最近經常叫吃McDonald魚柳包

一頭半個月都會滿足下佢
始終成日覺得舊包就係防腐劑
我自己都食少左McDonald
(其實我好鐘意食~)

邊食包邊食粟米邊講

〝yummy yummy 吖！〞

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

vvpoopoo

vv已經唔用potty
一定要去toilet
去公廁都堅持要坐唔比我抱住兜佢
遇到d真係唔係太乾淨既
我簡直係要搞盡腦汁
tum佢比我抱住佢v (汗！)

poopoo方面我總算放下心來啦
由於今個月要面對新環境
我曾經又擔心過佢會唔肯poopoo
還好一切都好起來啦
早一個月時我仲會將佢poopoo既日子記到實
數住佢幾多日未有得poo
呢個月我都忙到咩都唔記得喇…
好多時一返到屋企都會收到佢叻叻既消息^^

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

小芊芊語錄

1

之前我放工回家

小芊芊會斟水比我飲
最近佢改左口風

小芊芊：我拎對拖鞋比你著吖~

一放工回家見到呢隻小甜心真係冧爆 :)

----------------------------------------------------------------

2

係每晚上床訓覺既時候
佢總會掛住呢個掛住果個
第一位就係掛住舅母
〝我好掛住舅母呀 你而家幫我打比舅母啦！〞
其次係婆婆同曹姨姨

----------------------------------------------------------------

3

細細個開始
公公幫佢改左個獨家名
只有公公會叫佢做〝鄭板橋〞
事關公公話佢欠木 (而小芊芊本身個名冇木字)
有次公公叫佢口靚妹仔
佢用好嚴肅既口吻回應：
〝我唔係叫0靚妹仔呀, 我係鄭。板。橋！〞
我聽到果下真係O左咀
然後笑左 XD

-----------------------------------------------------------------

4

有日公公下午放工回來
小芊芊正在午睡
因為佢訓左係公公張床
公公費事入房嘈醒佢
就係梳化訓著左

訓訓下 佢比小芊芊拍醒左
〝公公 我比返張床你呀！ 你返入房訓啦！〞
公公訓到矇矇鬆鬆
當然聽左佢講走返入房訓

但原來小芊芊其實都係未訓醒
佢見公公入左房訓之後
佢就爬左上公公本來訓緊果個梳化位
好快又訓著左

-----------------------------------------------------------------

5

夜晚訓覺時
我會問佢聽日係星期幾
佢知道我同daddy星期一至五都要返工
跟住就好唔開心咁話
〝媽咪 你唔好返工同放假啦 你留係屋企陪我啦！〞
哈哈 後黎知咩叫放假之後就講得啱喇
〝媽咪 你唔好返工啦 你放假陪我啦！〞
跟住就好大力咁攬到我好實
寶貝女 媽媽我都期望緊
唔洗返工做ftm既一日啊~~~

-----------------------------------------------------------------

6

有日我地兩母女一齊訓時
小芊芊望住我 然後話：
〝媽媽 你係Mr Tall 我係Mr Small〞
(佢剛剛睇完library借返來的Mr Tall故事書)

我問佢點解媽媽係Mr Tall 佢答我：
〝因為媽咪有長腿囉！媽咪對腳好長呀！〞
呢個讚美黎架噃 我當然好受落啦！

-----------------------------------------------------------------

7

話說我呢排好鐘意咬佢面珠仔
有時我會無啦啦問佢〝媽咪可唔可以咬下你面仔呀?〞
佢好緊張縮開咁回應我：
〝唔得呀！我唔係食物黎架！〞XDDD

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

今期流行 :D

32個月大の口頭禪

點解xxxxxx? - 乜都問點解

問到你根本唔識答
為左唔想下下野答佢〝唔知〞
所以我會掉頭反問返佢 XD

今期最愛

Mr. Men and Little Miss

好早前我買左隻Mr Men DVD佢睇
可能細少少果時仲未識睇 一D興趣都冇
早個月去library借左一系列既Mr Men書仔睇睇睇
見佢咁有興趣
於是我又拎返DVD出黎播比佢睇
結果成為佢既大愛:D

有日佢同我講：
〝媽媽 我而家唔鐘意火車頭啦…
我係Mr. Happy！〞-_-"
咁岩bossini推出一系列Mr Men and Little Miss T
舅母即時買左兩件過佢
見到舅父同青青姨都著勁開心圍住佢地轉呢！

所以話佢既喜好呢…
真係只要一鐘意 就係人都知囉~~~

見到BALENO D Mr Men
就變得好shy (佢見到Thomas都係咁架喎)
但又要我同佢影相
仲企係人地個門口望住唔捨得走~~~

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

本月生活逸事

我要執返隻兔兔水鞋啊~
有日搭小巴
因得我一個帶住小芊芊 但佢訓著左
而我手上仲有一大袋物品
落車果陣好狼狽呢~
就係咁小芊芊其中一隻腳著住的水鞋掉了

這對兔仔水鞋係小芊芊既大愛
落唔落雨出街都好
只要比佢揀鞋著 佢都會揀呢對水鞋
我一落車 小芊芊就彈起左同我講
〝媽咪 我隻兔仔水鞋跌左喔〞
OoO…it's too late…
小巴係我地落車後0秒9就開走左

我嘛…只好放棄啦 (因為我一揪二leng中…)
我放 但小芊芊唔肯放
小芊芊：我地去追架小巴啦 (阿女 媽媽我真係有心無力啦…)
千千媽：媽媽拎住好多野又抱住你 追唔到呀！
小芊芊：咁我地企度等架小巴返黎啦！
千千媽：小巴唔會返轉頭喔 (因為係巡環線…)

小芊芊果刻真係好失望 好唔開心
搞到我個心好忐忑呀！
雖然我心諗好彩對水鞋唔貴 可以買過對
但我feel到買過對已經唔係果回事
我抱住佢企係條街度諗方法
等下一架小巴黎問下司機可以點做啦
司機話要去返站頭問
小芊芊應該見我盡左力
都乖乖聽我話返屋企

原來 小朋友對佢平日用既玩既著既
真係會有好深厚既感情呢！
好感性既一件事啊~~~


-----------------------------------------------------------------


我愛做家務
小芊芊最鐘意掃地 同埋飯後執碗
平日完食完晚飯 佢都會好想執碗
婆婆當然好怕佢打爛
同埋覺得佢咁細個洗乜佢做
我又唔同佢咁樣諗法啦
so我唔比人掂d碗 全部留返比佢疊
然後叫佢捧實慢慢行去廚房交比婆婆
佢好樂意 又做得開心^^

掃地大摡係老師教過所以識
因為我地同婆婆屋企都冇用掃帚的
有日係12蚊店見到小掃帚清潔玩具套裝
即刻買左過佢玩
佢不知玩得幾開心
係屋企見我行去邊佢掃到去邊
我就吸乾淨塊地比佢慢慢掃
小妹妹不停係度話：
〝媽媽 我真係好鐘意做家務架！〞

媽媽真心地希望你呢句係真心話啦 XD

 小芊芊既新竉兒 12蚊幾抵玩 :)

掃完凳又掃地 對新玩意愛不釋手

連訓覺都唔肯放手 :D


-----------------------------------------------------------------


肯自己刷牙喇

一直都唔急要小芊芊自己刷牙
(因為我要快…同佢刷乾手淨腳呀 XD)
btw 主要係深知小朋友多數都唔鐘意刷牙 (我細個都係咁 XD)
不過呢個月開始 間唔中佢會要求自己刷
係我時間許可之下 一定會滿足佢啦!
感覺佢係生活自理方面好有進步呢！

平時拎埋杯杯牙刷入房同佢刷
清水刷 仲未肯用牙膏

大部份時間肯自己刷牙之後
就搬返佢入浴室等佢慢慢刷


-----------------------------------------------------------------


我們搬家了

6月忙 係忙搬家
新環境新開始
小芊芊8月中開學
希望佢可以係開學前先適應到居住環境
點知…原來係0適應期
小芊芊根本唔需要時間去適應
入伙當日 佢一入屋已經開心得不得了
仲周圍同人講佢搬新屋住
叫人地去佢屋企玩 -_-"


-----------------------------------------------------------------


媽媽 其實我好鐘意跳舞架！
我怕佢唔適應新屋
係因為6月時佢開始學跳舞
舞舞係佢試完堂後自己話好想學
我先交學費比佢正式上堂
點知…頭兩堂喊住唔肯入跳舞室
連帶平日星期三五返playgroup都要喊餐飽先入課室…

playgroup老師話呢個階段既小朋友都係咁喎
因為試新野要適應期
同班幾個同學仔全部都係咁…(係咪架…)
其實佢試堂果日好開心架喎
自己同我bye bye入舞室架
我仲見到佢自己跟住miss做動作做得好好
所以我先交學費佢上堂…

由於呢次喊既經歷
咁我預左佢搬屋同黎緊新學校返學時
都肯定會喊餐飽囉
所以好趕住咁入伙預定晒適應期比佢
點知一住新屋後
佢連上跳舞堂都勁開心
見到同學仔喊仲勸返人轉頭tim
真係估佢唔到呀！
希望佢黎緊返新學校同坐校巴都係咁叻叻啦！

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

HAPPY 32TH MONTHS - SOLE

叫佢擺pose比我影相
佢竟然踎係度…-_-"

Daddy節梗係要影下相~
以前佢一見呢d牌仔就破壞王上身
塊牌唔爛唔安樂…
而家大左識得話靚靚要影相啦！

不過Daddy未起身囉…

商場既mini版 Marry-go-round
自己入一次錢 人地入一次錢 及後再人地又一次錢
咁就轉左3次 好滿足

最近訓覺訓得好斯文

沖涼玩泡泡都不忘賣下廣告XD

最愛她的HAPPY FACE

閒時最愛去遊樂場

最近人氣一時無兩既…老翻共田牌怪獸巴蕉扇
天氣太熱喇 我地都黎湊下熱鬧

ooo…邊度似2歲半 ??????
呢條裙連外套仔係未出世時婆婆買架
由半歲著到而家 今年fit晒身
條裙著足2年 好抵著呢~

Mami's 小甜心 ♥

daddy去買鞋時 佢就拎人地d高踭鞋黎著
係咁話d高踭鞋好靚…
又不停叫我著下 仲叫我買-,-

扮喊中…古古惑惑…

apm隻b duck係佢個friend
次次放學行apm見親佢都要攬頭攬頸

其實而家叫佢望鏡頭影相係超有難度
真係要用連拍喪影先有機會影到…

學左跳舞舞之後 成日都話要做一字馬

見公公砌西瓜
佢即刻係玩具箱入邊搵把刀出黎
係咁話要自己砌 XD
於是公公比左舊佢叫佢自己砌黎食~



細細粒著住見芭蕾舞衣 真係好得意 :)

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

HAPPY 32TH MONTHS - FAMILY

其實daddy仲想訓
不過小芊芊話要影相
夾硬捉daddy起身影XD

兩父女開始古靈精怪

我同佢玩自拍 佢多數都好合作

daddy一加入 佢就變身喇 ^,^

2 YEAR OLD MONTHS REVIEW
小芊芊 ♥ 31Months成長印記
小芊芊 ♥ 30Months成長印記
小芊芊 ♥ 29Months成長印記
小芊芊 ♥ 28Months成長印記
小芊芊 ♥ 27Months成長印記
小芊芊 ♥ 26Months成長印記
小芊芊 ♥ 25Months成長印記
小芊芊 ♥ 24Months成長印記