教育篇‧ 不要 "打打" 要 "叻叻"

2014年4月
小芊芊 ♥ 18Months+
教育小體驗 - 不要 "打打" 要 "叻叻"

有日媽咪同我講小芊芊係公園打姐姐
我以為可能係芊芊唔小心
(之前同佢去公園玩從來冇見過佢打人)
隔幾天 奶奶同我講佢去到公園見到小朋友
就舉起隻手話 "打"
oooooonononnononnono!!!
(當時都仲係認為佢冇意識咁講的…)

於是那天晚上睡覺時我問小芊芊
我：我地去街街 見到小朋友 你會點做呀?
芊：(舉起一隻手好大聲咁講) 打!
我：點解哦? 咁做唔禮貌咕喎
芊：打! (跟住一野打落我手臂度)
我：小朋友咁樣唔乖架
        媽咪教你你跟住做吖
        見到哥哥姐姐既時候 我地要say Hello
       (揮手) hi~~~
芊：(跟住我一齊揮手) hi~~~

果晚我就輾轉反側係咁諗點解小芊芊會咁
心裡有無限個為什麼…
我地從來冇咁教過佢架喎
小芊芊以前見親小朋友都一副好想同人玩咁既樣
又點會打人呢?????
但而家佢講打既時候好似好凶恨咁…
到底受左咩刺激呢???
到底我應該點做呢???
諗到連眠都失埋…
(諗d咁既野都可以令到我失眠 !)


諗左一晚
第2天 我就同兩邊家人講
1. 唔好再係芊芊面前講個 "打" 字
尤其是公公 真係好衰
有時個孫唔so佢 佢又唔忿氣
小芊芊一扭計就即刻話佢 "越大越唔乖喇 聽打喇! "
婆婆就講慣姿勢
平時見佢開櫃桶呀 入廚房呀 拎remote呀 就話 " 打打 "
總之從今之後要收口 要打既唔該出街打!!!

2. 全家人教導芊芊言行要一致
總之一見小芊芊舉起手叫打
就即刻教佢揮手同小朋友講hi~
事後要同佢講返 打人唔叻叻的 / 無禮貌的
say hi先係叻叻既小朋友
同埋當見到小芊芊同小朋友say hi
就即刻讚佢叻叻

還好個個肯合作
小芊芊個世界暫時冇 " 打 " 呢樣野存在喇

3. 積極實行"潛移默化"
不過連續一星期每晚訓覺時問佢同一問題
佢都係繼續 " 打! "
連出街一見到小朋友都係同一反應
即刻舉起手講 " 打 "!
我有理由相信 小芊芊係受左嚴重打擊
(唔知佢係咪係公園比小朋友好大力咁打過…)
果刻見到阿女既行為 真係驚驚地
仲有超級擔心
新手媽媽既我 不知如何教
小芊芊每個階段都係一個挑戰
唯有每晚都教佢say hi~ (say足兩星期)
hi到佢真係會say hi為止


大約兩星期後既有一天
我抱住芊芊行街街時見到有小朋友
佢指住d小朋友叫我
然後佢對住d小朋友揮手 "hi~"
跟住望住我 豎起食指講 "叻叻!"
我望住呢個叻叻傻妹妹
果刻真係好開心
開心到不停錫佢面仔講 "叻叻!"
再同佢講 "做得好好呀! 以後見到小朋友都要咁呀! 叻叻!"


呢個係我一個小小既經歷
我知我往後和小芊芊行既路
肯定有更多更大野既挑戰
小芊芊性格受軟唔受硬
硬頸性格應該同佢阿媽有過之而無不及
所以對佢一定要軟硬兼施
慈母 嚴母 慈母 嚴母 慈母 嚴母 慈母 嚴母…
keep住咁樣 真係好難!!!
我而家深切地明白…
點解只可以用軟攻既老公tum極都tum我唔掂喇
Wakakakaka!!!