小芊芊 ♥ 16 Months成長印記

小芊芊‧16Months
2014年2月12日-3月11日
Week 70 - Week 74
489days - 516days

10個月前既小芊芊對鞦韆仲未有反應
今日小芊芊一坐上去就玩得勁開心啦~

行路行得未夠穩 但又要未學行先學走

仲要點都唔肯比我拖 叫佢行東佢就行西

所以…

件衫有帽仔真係方便好多

我又唔洗烏低身捉住佢 又可以control到佢行既方向

最重要佢仲未識得甩開我 XD

Height : 76cm
Weight : 20lbs
Foot length : 12cm
No. of teeth : 6

餐食
•2號奶 : 早餐7am / 下午茶3pm / 宵夜10pm
•lunch : 3餸爛飯 (大人standard碗滿碗份量)
•dinner : 3餸爛飯 (大人standard碗滿碗份量)
•每餐必有深綠色菜
•雞蛋隔日食
•魚肉(紅衫魚鯇魚三文魚驢魚)瘦肉間餐食 
•其他豆腐薯仔蕃薯蕃茄南瓜蘿蔔間餐食
•肉同菜開始大舊咁比佢食 唔砌咁碎喇 不過始終少牙仔 d餸都係要砌粒粒
•fruit: 而家直頭唔肯食水果…
•snack: 有果肉既乳酪 / 卡夫芝士 / 白面包 / 比bb食既cookies / 牛奶小饅頭

叫佢食野真係好難
比佢試下街外食物
湯烏冬湯河粉最鐘意食(因為有味精)
雪糕 蛋糕 布丁 全部唔肯食
水果同樣 呢期只肯食橙 但食兩片就唔睬你
即使塞到入口 即刻lur都lur唔切
我已經話之佢 佢識含識lur 逼佢唔黎囉
總之肯乖乖同我清兩餐飯
奶唔食都冇所謂喇~

小芊芊極唔鐘意食冇口感既野

如雪糕 布丁 cream之類的…

呢個薯仔紅蘿蔔牛肉飯泥+牛乳布丁bb餐

佢自己畢晒d薯仔紅蘿蔔牛肉就停口

然後畢晒d飯泥比我食

件布丁擺到佢口邊就一野推開我-_-"

呢個板長既蕃茄牛肉湯烏冬

佢超級喜愛d冬冬

邊食邊追追到見到隻碗冇冬冬為止

我地驚佢搞碗糖水 所以放到好遠

佢對眼仔一直注視住冇轉移過

當爸爸一遞起隻羮 即刻擘大口要食~

湯水
•湯一星期一次
•蕃茄薯仔湯 / 紅蘿蔔粟米瘦肉湯 / 豆腐魚湯
•1次過飲到大人一碗份量 會追飲
•早排識吐水 飲飲下含住係口入邊chok幾chok lur出黎…
後黎媽咪叫我唔好比咁大啖佢飲
可能大啖得滯佢唔想飲
咁我就睇住佢飲唔比佢飲咁大啖
哈哈~又ok喎
•而家除左宵夜支奶用奶樽
其餘時間都係用水杯飲水同飲湯喇
•果汁唔肯飲 水果又唔肯食 冇野講…



訓覺覺
都係晚晚碌半小時至1小時先訓
10pm碌到11pm
一訓訓到朝早 以前6點左右就醒
而家多數6點半打後開始狂轉身扭醒
即刻開支奶比佢飲就會即刻訓返
平日訓多啲
第二朝如果訓到9-10pm 咁下午就3-5pm兩小時覺
第二朝如果訓到8am 咁就1-2pm一小時覺
但一到假期呢…
飲完支奶訓左陣 8點就會自動起身叫醒埋你-_-"


 
便便
•唔係日日有
•有時連住兩日有 有時隔1日 有時隔2日
•深色 硬(but坐得扁果隻)
•偶然間先會有一兩次會有金黃既軟便便
•甘甘條用左三次 其中一次係因為發燒 



扭計
•同樣地 weekday嫲嫲婆婆湊都極少扭計
•對住爸爸媽媽 扭計招數高左
開始識唔制喇 要得到果樣野點都要得到
好在唔多尖叫(但都會大叫!)
最叻係識爆喊 喊都7情上面
塊面谷到紅過關公 d眼淚洶湧而至
d大豆一大粒一大粒咁流晒出黎
我當然係會由得佢喊果個
但爸爸就唔得喇 下意識不知不覺間投降
結果我要惡教埋人地個仔!!!
拜託你唔好教寵壞我個女好冇?!?
不過還好 即時搵第2d野引開佢注意呢招都仲管用
遲下比佢拆左招真係要鬥智鬥力喇…



學講話
•好鐘意叫爸爸媽媽,仲要叫果時笑得好鬼甜, 真係lum c我~
•叫爸爸多d, 但爸爸話芊芊成日叫佢媽媽 哈哈!
•想講野, 知佢想講叻,姨姨,拜拜,杯杯,但發唔到個音
•而家我返工時打電回家 佢終於識得對住電話筒講野喇
•學講yeah, 到, 不過發音唔準

一個大朝早笑住叫媽媽 真係甜到入心入肺

差d連工都唔捨得返

認知
•冇 - 知道咩叫"冇", 唔識講, 但學到我地口形(o咀) 仲要有埋手勢
•知道咩叫唔好, 我地一話咁樣唔好, 佢就即刻手擰擰咁示意比我地知
•吹吹 - 一叫佢吹吹佢好斯文咁吹
•happy face - 一講happy face就雙手用手指篤自己或者我塊面珠
•識踩未識踢 - 叫佢踢波波,知佢想錫, 但行為上係踩住個波
•搯飯食 - 會自己拿匙羮搯飯比自己食
•抹咀 - 知道食完飯要抹咀, 一見紗巾就拎黎抹咀
•識翻筋斗 - 一走我我地或者婆婆張床玩得興起就會打關斗, 偶爾會打到個直翻體架
•識玩單槓 - 鐘意玩到唔捨得返落黎
•識推車仔 - 鐘意推三輪單, 但唔肯坐, 不過佢仲未夠腳長踩車車

婆婆問佢爸爸係邊 (爸爸未放工)

佢就咁樣回應

想講 但做到口形但未識發音

一叫佢happy face

即刻兩隻食指仔篤住自己面珠done

呢個教左一次就識啦~

自己食飯仔 每餐畢幾啖出黎比佢自己畢來吃

好偶爾會翻到一個好正宗既筋斗

一翻到就勁開心~

呢個欄杆真係不得之了

玩左一次就愛上

係個商場度玩左半粒鐘-_-"

一放佢落黎就大叫要我地放返佢上去

乜畏高都冇 望住出面咁玩都冇驚驚

放佢上車鬼渣咁叫

見佢推住架車佢又要推

咁樣推都玩左好耐

知道筆筆用黎畫野 畫下畫下畫埋自己隻手 XD

小芊芊16個月最明顯既發展

就係識得同其他小朋友互動

呢個playground d小朋友好乖好nice

小芊芊起初同我地玩的

之後有對小兄妹跟住小芊芊 想同佢玩

我叫小芊芊同姐姐哥哥一齊玩

好快小芊芊就混熟左

對小兄妹就拖住佢去玩

仲有兩個小姐姐拎住d公仔

見到小芊芊望住佢地 佢地又侵埋芊芊玩

跟住就成班小朋友lui埋一堆喇~

呢日小芊芊玩得勁開心呢!

有一日
見佢谷便便谷得好辛苦
不以為意 心諗冇理由尋得便便左今天都會谷
點知一整日佢都唔舒服 又去唔出
見佢谷到喊 最後出動甘甘條
終於放左隻石頭咁硬既大雞蛋出黎
諗唔明佢到底食左d咩搞成咁
後來之後一日上playgroup先知
原來阿女發燒 -_-"
唉…多得支爛鬼體溫計 點度都36.幾度
明明我係覺得芊芊好興 果兩日一直不停摸佢額頭
但個個都話我諗多咗
媽媽對於自己仔女既直覺真係準到冇朋友吖

冇得返學 去到門口都要折返

唔知小芊芊係想返學但知道冇學返

定真係發燒燒唔舒服

落到學校樓下就粒聲唔出 

鬱鬱不歡咁既樣

陰公豬!

還好當日退左燒 可能係比爸爸小感冒傳染
好彩芊芊只係發燒冇其他問題
當日仲食得玩得訓得咁去左daddy公司bbq
第二日 二話不說 走去aeon買返個百靈牌
一早話買百靈牌啦 有人係唔信邪話百靈牌得個名
芊芊出世後前前後後買左一支肛探 兩支電子計
計落可以買支百靈牌啦

仲有 我唔會再信任何人架喇
阿女既事 我都係要信自己
因為我完全明白
有好多野 只有生你既媽媽先會感應到
世上只有媽媽好呀嘛 :)

事業上
我呢個在職媽媽
或者又要回復未嫁時既出trip日子
其實不是不想
但我呢刻仲未做到可以見少阿女一晚
我真係見少小芊芊一晚都唔得架
由佢出世到而家
除左我逼不得已入醫院果個星期
出院之後既日子
我個心同個腦 幾乎都係得阿女
要我揀寶貝女同事業 後者跟本冇可比性
大肚果刻開始 我已經不自覺咁揀左
下意識經常地羨慕因小朋友而轉做FTM既媽媽
錢 從來唔係我至愛
只係認同冇錢萬萬不能而已

好希望可以快d上車啦
等埋老公事業穩定埋之後
我可以專心地相夫教子 Heehee~~~

去公園最鐘意sir滑梯 一sir就勁hyper

知道我買衫衫比佢 我一比完錢佢就拎住個袋唔肯放

係間shop不停行不停轉 轉足個字

出左門口又自己掉頭行返入間shop 搞笑!

係屋企客廳既hea hea look同埋係媽咪房既miss hk look

勁鐘意我件睡衣 晚晚一見到就拎起要我咁樣同佢著

果然係百份百既貪靚bb女呀

100%遺傳晒媽媽既貪靚基因 hahaha!

快進入爸爸媽媽既生日月喇

好多姨姨叔叔們排住隊見面呢!