小芊芊‧15Months
2014年1月12日-2月11日
Week 66 - Week 70
458days - 488days
Height : 73cm
小芊芊好少扭食
只要佢食左正餐或者飲左奶
就算見到我地食野 佢都唔care
我地諗住比少少新野佢試 想放入佢口 其係一件難事…
燉蛋燉奶唔食 海綿蛋糕唔食
連個個bb都鐘意食既雪糕佢都耍手擰頭
總之佢有野落左肚仔
就唔洗旨意佢食其他野
訓覺覺
學走路
試過係地鐵月台放一放低佢 哇! 走得快到哩…
認知
Weight : 20lbs
Foot length : 12cm
No. of teeth : 6
餐食
- 2號奶 : 早餐7am / 下午茶3pm / 宵夜10pm
- lunch : 3餸爛飯 (大人standard碗滿碗份量)
- dinner : 3餸爛飯 (大人standard碗滿碗份量)
- 每餐必有深綠色菜
- 雞蛋隔日食
- 魚肉(紅衫魚鯇魚三文魚驢魚)瘦肉間餐食
- 其他豆腐薯仔蕃薯蕃茄南瓜蘿蔔間餐食
食飯時間快則9個字 慢必過小時
啖啖大口大口食 少含飯 但鐘意 "妹"
大啖好細啖好 "妹"既時間都係一樣-_-" 所以食得好慢
so 只有媽咪嫲嫲同婆婆肯餵佢
爸爸一見佢食飯就入房打雞-_-" -_-" -_-"
- 肉同菜開始大舊咁比佢食 唔砌咁碎喇 不過始終少牙仔 d餸都係要砌粒粒
- fruit: 唔多吃 只喜歡食香蕉 其他食少少就走佬 士多啤梨藍莓蘋果火龍果橙一律過下口就走人…媽媽我認真無奈 唯有鮮榨蘋果汁比佢飲
- snack: 有果肉既乳酪 / 卡夫芝士 / 白面包 / 比bb食既cookies / 牛奶小饅頭
還好健康既零食佢都好
另外最鐘意食牛奶小饅頭
(應該係因為岩手形易拎起擺入口所以鐘意)
不過小饅頭我都係嫌佢有砂糖成份唔想比佢食咁多
爸爸就好鐘意比佢食 因為見佢食得開心:p小芊芊好少扭食
只要佢食左正餐或者飲左奶
就算見到我地食野 佢都唔care
我地諗住比少少新野佢試 想放入佢口 其係一件難事…
燉蛋燉奶唔食 海綿蛋糕唔食
連個個bb都鐘意食既雪糕佢都耍手擰頭
總之佢有野落左肚仔
就唔洗旨意佢食其他野
湯水
- 湯星期一次 (婆婆煲1次, 嫲嫲唔多肯煲…) 蕃茄薯仔湯 / 紅蘿蔔粟米瘦肉湯 / 豆腐魚湯
- 水就飲得好好 個Kitty大水壼佢勁鐘意 一比佢就攬住放入口啜啜啜
水 果汁及湯都會比佢用杯飲
而家用杯杯飲野好少會 "逐" 親
會自己拎住杯耳自己飲 未識連續幾啖咁飲
佢會飲左一啖 放低隻杯 再放入口飲一啖 又放低隻杯
不過有時意玩水 尤其飲到最後 唔識昂起個頭飲
飲極都飲唔到時 佢就起手倒轉隻杯…
- 湯通常一次過飲比standard碗大既一大碗
- 水就隨意 每次添完比佢好快就飲晒
- 果汁通常一次過飲8Oz
少 - 夜晚大多數碌半小時至1小時先訓
10pm碌到11pm
第二朝如果訓到9-10pm 咁下午就3-5pm兩小時覺
第二朝如果訓到8am 咁就1-2pm一小時覺
然後一直到夜晚
出街如果推住車仔訓 都訓得耐
當然視乎去咩地方
訓覺一定要我陪佢訓 佢訓著之前都唔可以走開 一知我走就爆喊
便便
- 唔係日日有
- 有時連住兩日有 有時隔1日 有時隔2日
- 依然唔係靚便便 飲水多左d便便都係咁 已經唔多清楚 亦冇再去研究係比咩食物影响
- 深色 硬(but坐得扁果隻)
- 偶然間先會有一兩次會有金黃既軟便便
- 甘甘條冇再用喇 好大既進步^^
出牙仔
出得好慢呢…
10個月出第1隻牙仔後
第2第3第4隻牙都係11個月既時候走出黎
但跟住就停滯左一段時間
早個月唔係好肯食野 吽緊牙仔
夜晚同佢刷牙仔時都摸到上邊第3第4隻門牙位硬硬地
仲以為好快會標出黎
但等左成個月都冇動靜
直至上星期先真正見到第5第6隻白色牙仔
而家兩隻都出左一半喇~
希望快d出多d牙仔
咁出街就可以同我地一齊食飯啦!
扭計
- weekday嫲嫲婆婆湊都極少扭計
- 我地say no較多 一唔比就尖叫 so我地係度就間唔時扭下計
- 出街搭車開始要扭落地 尤其我地去邊都咁長途 坐巴士一扭眼訓真係驚
- 坐地鐵唔要車車要扭落地 搞到我地要全程抱住佢 雖然小芊芊得果20lbs 但手抱真係好快累 所以最近多左帶hip seat 唔肯坐車車果陣就出動佢
- 除此之外 其他時候都好乖好靜
古靈精怪
- 唔知幾時學識漱口 比水佢飲 尤其是臨訓刷牙仔前 含住大啖水 第1次我唔為意 佢無啦啦吐左乍水出來 我仲好傻婆咁以為佢邊度黎咁多口水! 後來佢飲左啖水 仲要卜起兩個鰓chok兩下 又吐乍水出黎-_-" 整濕件褸同我張床…
- 有次佢想飲湯 因為湯太熱 我就哄埋個杯度吹兩吹 佢一見到就要自己拎隻杯 竟然用鼻仔噴d氣落隻碗度 跟住自己勁開心 哈哈!
- 早幾日自己用口吹隻公仔 我諗教下佢應該好快識吹泡泡
- 地下一見頭髮或者其他垃圾就執起比我或者婆婆 執唔到就呀呀呀咁叫我地執
- 見婆婆用紙巾抹地佢又要紙巾係地下捽捽捽
- 一拎起remote就學足公公神態 隊個remote向住電視亂咁禁
- 訓醒左唔會即刻扭起身 學公公d他條神態用雙手托住個頭周圍望
- 一搭lift要禁制
- 一上電梯要學我地捉扶手
- 鐘意手指指 見人就指 想知咩又指 想同人玩又指
- 夜晚陪佢訓覺 見我除眼鏡 佢會唔比我訓 係咁推我要我起身 周圍搵我副眼鏡逼我戴返 我唔戴佢會幫埋我戴 亂咁塞副眼鏡去我塊面度
學講話
- 媽媽 - 少講左 因為識得叫爸爸
- 爸爸 - 講得好清楚 識講爸爸之後就不停爸爸 開心死佢爸爸!
- 奶奶 - 想訓教要食奶奶就會nananana咁叫
- 拜拜 - 之前搭親地鐵 每個站一開門就就扭要出去 於是我每個站都教佢同果個地方拜拜 結果好快就連個音調都學埋咁講拜拜
- 其他都係外星話 通常叫佢講佢唔講
電話一响 係都要有佢份聽 但一聽就唔講野一聽到人同佢講野就即刻笑住咁推返個電話比你
- 聽過佢學我地講佢個全名 "唔好意思" "咩事呀" "點解呀" (但全部都唔清楚的)
去完清邁返黎 行路進步神速
教左佢一次扶住一邊落樓梯 同落床一樣
教一次就去到邊都識扶住野落一級
不過一落地行就點都唔肯比你拖手…
飲醉咁行路都行得超快 完全係未學行先學走既表現
唔怪得話bb一識行就要看牛咁看
原來真係睇少一眼(半秒)都唔得
上次去迪迪尼放佢落地行 一落地就係咁就圍騰
要追住佢行 想叫停佢係要走埋去捉實佢先捉得住佢
咁岩老公比張紙巾我 只係接一接紙巾果兩秒
腳邊既阿女就走甩左
仲以為係左緊 360度望暈自己身邊都唔見個女
朋友離遠大叫話我知個女係"果邊"
果個 "果邊" 原來九丈咁遠!!!
哇! 唔見佢果刻真係嚇到心都離埋!!!
兩秒已經彈左去九丈遠 飲醉酒咁走都可以走得咁快!
我一個人又推住架bb車 幾乎(係根本先岩) 捉唔住佢
好彩有個大叔好人 幫我稱住佢頂衫帽截停佢比返個女我咋
我自己一個帶佢出街真係完全唔敢放佢落地呀~
去到公園草地更加捉佢唔住 無窮既精力由這刻發放
幾眼訓既佢都仍然有精力走呀走
再大d我想像唔到我會點喇…
- Hello - 一同佢講Hello 佢就揮手
- Bye bye - 一同佢講拜拜 佢就自動獻(飛)吻 (個飛吻終於識飛開喇!)
- 音樂 - 一聽到音樂就前前後後或者左左右右大動作咁搖 有時會自己哼歌
- 眼耳口鼻手腳牙 -
- 眼眼 - 即刻咪實對眼
- 耳耳 - 指住我隻耳
- 口口 - 指住自己個咀
- 鼻鼻 - 指住自己個鼻 最近仲即刻插埋隻手指入鼻窿 (救命-_-")
- 手手 - 舉起手仔
- 腳腳 - 隊隻腳去我個咀度 哈哈!
- 牙牙 - 伸條脷出來 或者塞隻手指去我個口度要篤我d牙…
- 梳頭 - 一比把梳佢就渣住梳自己或者我個頭
- 刷牙 - 一渣住就隊支牙刷入我個口度
- 抹枱 - 而家好少撕紙巾 一拎住張紙巾就抹枱 係地就抹地
- 掉片片 - 一同佢換完片 佢就急不及待起身要拎包片片去垃圾筒掉
- 唔准 - 係婆婆家唔准入廚房 唔准搞拖鞋 唔准開櫃 佢都做到 我地都冇用過門欄 佢去廚房找婆婆就會企係門口等婆婆應佢
我超愛這幅相 一見到就由心到笑出黎
寶貝笑您笑得好可愛!
基本上我地講乜佢都識聽 只係未識講野表達
識睇人真嬲定假嬲 嫲嫲婆婆青青姨驚都未驚過
爸爸媽媽都唔多驚 最多喊兩聲 我地唔理佢就唔再扭
最驚公公同叔叔
有時扭計 公公一喝 即刻定格唔敢郁
同埋睇佢肯唔肯聽你講野 (有時越叫佢no佢就越要做)
最搞笑係佢一直都知邊個係舅父 問佢虎虎係邊佢知係邊
但問佢母母係邊 佢依然係走去虎虎度
叫佢比野母母 佢就將d野比晒虎虎
寶貝女話咁快就16個月
呢個時候既小芊芊真係好可愛好可愛
越識得多 越老積
雖然我好唔捨得您咁快長大
但同時又好期待你長大之後
與我地之間好有趣既互動
同埋一切愛既表達 總之
我地會比您一個好快樂好快樂既開心童年啦!
沒有留言:
張貼留言