身體健康最重要★

上星期千千媽幾乎冇訓過覺

因為小芊芊同daddy同時病左

跟住婆婆比公公傳染又病埋

雖然我唔洗做housework

但返工之餘又要照顧兩個病人

原來咁樣都可以幾heavy…

小芊芊出世以來身體都好好 (touchwood :)

次次小病都係因為我地既唔小心

不過體質唔錯既小妹妹次次都好快好返 (touchwood :)

尤其而家呢個H3N2既流感高鋒期

我同daddy對於衞生方面更加會好小心…

40度高燒ing既可憐豬 病到咩反應都冇

心痛屎佢媽媽咯…

2歲生日前兩星期

因為夏天著條背心裙太薄出入商場冷親

結果第二日發燒加傷風

自此無論冷熱去邊著咩衫

我都同佢著件底衫打底

2歲生日後一星期

因為夜晚打開左窗訓

佢又咁岩訓窗邊兼且露左肚仔

到我半夜發現經已太遲

第二日即刻發燒又再次傷風

自此每晚訓覺一定要關左大窗

再買埋夜晚訓覺專用既睡袍

包佢露唔到個肚仔出來

點知…點知…

我呢個成日都論論盡盡既mami

係新精頭都未過既新年流流

又搞到小芊芊病左…-_-"

今次係腸胃炎！！！

★★★★★★★★★★★★★★★★★★★★★★★★★★★★★★

2015年3月1日   星期日 -

2015年3月6日   星期五

小芊芊 ♥ 28Months 18Days - 23Days

發燒第1晚全日冇退過燒 不過白天訓飽左 夜晚精神左好多

事緣在年初十小芊芊表演完的後一天

她8點鐘就叫醒我 當時仲好精靈

指住窗外問我今日會搭咩車

一摸佢頸後 熱到呢…乍乍臨同佢探熱

OOO…38.5度 但係手仔腳仔都係涼的！

同佢貼左退熱貼同抹面仔飲水水

點知隔左一陣 (只係我刷牙洗面既短短5分鐘)

小芊芊就謝左 聽緊歌仔既佢(平日會跳舞的)

攬住個枕頭訓左係床望住我冇晒反應

再度一度體溫 40度！小芊芊第1次發高燒…

即刻打電話約見醫生

快要見醫生時候 來了次噴射式嘔吐

醫生診斷係腸胃炎 冇屙冇其他感冒徵狀

開左退燒藥 肚痛藥 止嘔藥 和 消炎藥

小芊芊都好叻 肯乖乖食藥 

氹下氹下都比平時飲多左好多水 仲不停去VV

5顏6色咁 唔想比佢食 但唔食又唔得…

第1日好累冇精神 冇退燒 但好有胃口

第2日超精神勁有胃口 不過都係唔退燒

第3日半夜出晒汗退晒燒

朝早起過一次燒後就冇再起燒

不過嫲嫲話佢當日好扭計 到夜晚我放工返到屋企仲扭計

自呢一晚開始到第6日 連續4晚

每晚到9點左右就同我講好累 要沖涼訓覺

(平日我唔叫小芊芊係絕對唔會主動叫沖涼訓覺的！)

呢個時候摸佢手手腳腳同埋後頸額頭 都係涼的！

連續呢幾晚只有35.0/ 35.2/ 35.4度咁樣

高燒過後低溫?!? 是正常現象嗎?

病病豬第二日既情況…

雖然全日冇退過燒 但實情係精神無比

仲一早起左身唔比請左假陪佢既媽咪訓

拎住啲tissue係咁撕 仲擺條紙巾係個頭度

話比我知佢帶緊頭箍 哈哈~~~

全日飲左好多水 不停咁去potty

一邊坐一邊娛樂不停咁係房同toilet穿梭洗potty既千千媽

佢好得戚咁話〝坐potty要蹺腳架！〞

病得咁精靈我都冇咁擔心…

★★★★★★★★★★★★★★★★★★★★★★★★★★★★★★

2015年3月7日 星期六

小芊芊 ♥ 28Months 19Days

於是第7日我又帶小芊芊去睇醫生

因為呢日係婆婆家 所以睇返婆婆呢邊個兒科醫生

不過因為小芊芊日抖好正常

所以醫生只了解情況但沒有結論

她更是第一次見到有小朋友連續每晚才有低溫情況

於是建議我到私家醫院留院觀察…

聽到入醫院 好像太誇張了吧…

但幾晚低溫又可以說是不正常

小朋友高溫低溫 有病真係可大可小

婆婆叫我再睇第二家醫生先再決定

返正入院都要係私家先睇門診

睇左門診再決定吧…

其實小芊芊病的期間 老公都病埋

這天老公才剛剛退晒燒精神好返啲

就要他出來九龍帶小芊芊睇醫生

醫生refer我地去St Teresa 好彩兒科唔多人

好快就到小芊芊 不過…不過…

醫生聽左個情況 referral letter睇都唔睇

就話佢好正常 就算35度都唔係咩大問題…

完全冇解答過我既疑問

淨係話 如果今晚再度都仲係35度

咁你地自己決定 今晚帶佢去聯合啦 -_-"

去到呢個位 我都冇野想再問… 

(佢hea答程度仲離譜過政府d門診！)

點知呢個時候 老公好講唔講講左句

" 佢幾日冇便便！" (我都冇諗過講 邊度關事…)

結果醫生話 " 咁要同佢通左便先 "

就係咁要我地買藥比診金再去等姑娘通便…

買藥果刻我經已火滾 

我黎呢度係帶個女黎低溫情況個喎

要通便我冇辦法咩 洗鬼你黎做咩！

見到個女搞肚肚唔舒服我就好唔開心

還好到夜晚返到屋企都好地地

呢晚體溫都係低 35.8, 36.0左右 

冇之前咁低喇~

★★★★★★★★★★★★★★★★★★★★★★★★★★★★★★

2015年3月8日 星期日

小芊芊 ♥ 28Months 24Days

到第二朝小芊芊一起身就話肚痛

又不停咁想屙便便 洗potty洗到我唔想洗…

見佢又屙又肚仔痛 唯有再睇多次醫生…

今日睇返第1次睇腸胃炎果個醫生

醫生話 小朋友腸胃炎期間日日食粥水

幾日冇便便係正常！

再話 用過水狀甘油通便會搞肚 第二日都仲搞肚都係正常！

低溫好難講原因 未完全病好都有可能會咁

開左腸胃藥同肚痛藥 而家等佢屙清晒就應該冇事

幾分鐘對話 我個心安樂晒

★★★★★★★★★★  THE  END  ★★★★★★★★★★

成件事真係好無聊！

尋日兩個醫生 一個嚇我一個耍我

我就傷財小芊芊就傷神

新精頭就比呢d野舞足我一個星期

其實成因只係一兜pizza hut外賣既蒲汁焗四蔬！

小芊芊表演完畢當晚去左朋友屋企拜年

晚餐叫左pizza hut 朋友一家4口跟我地一家3口

得我同小芊芊食晒果兜蒲汁蔬菜

我好肯定係呢兜野搞到我個女第二日腸胃炎

因為我當晚搞肚痛屙清左所以冇事

大人唔受得都搞肚 小朋友唔腸胃炎就假啦！

保持清潔保持溫暖預防冷病 我可以做到

但食物方面 平時覺得唔乾淨或者太油膩既

我都已經揀過先比佢食 呢次真係冇可避免…

身體健康真係好重要好重要

新既一年 我父母細妹 老公同小芊芊全部病晒

真係聽到都頭暈 其實比我一個幫佢地病晒咪好囉！

佢地病得我一個做野得我一個睇住佢地

我病左我先有得抖下比人服侍下呀 XDDD

(touchwood touchwood 唔講邊有得笑：D)

希望今次病好晒 個個都繼續身體健康

咁就可以開開心心咁去玩喇 呵呵~~~

見過公公同daddy口罩

小芊芊成日都好好奇

呢日終於買到bb口罩

傻妹妹一見到好興奮 當左佢係玩具 :)